અમદાવાદમાં બે અધિકારીઓ 15 લાખની લાંચ લેતા ઝડપાયા, એસીબીએ ટ્રેપ ગોઠવી રંગે હાથ દબોચ્યા

આરોગ્ય વિભાગ દ્વારા બંને ડોકટર સામે પ્રાથમિક તપાસ શરૂ કરવામાં આવી હતી અને તપાસ અધિકારીએ આ ખાતાકીય તપાસ ઓકટોબર-2024માં પૂર્ણ કરી પોતાનો અહેવાલ જાન્યુઆરી-2025માં જમા કરાવ્યો હતો.

આ સમયગાળા દરમ્યાન ગિરીશભાઇ જેઠાલાલ પરમાર જે સરકારી ડેન્ટલ કોલેજ, અસારવા અમદાવાદ ખાતેના નિવૃત્ત ડીન હતા. તેમણે ફરિયાદીનો સંપર્ક કરીને ફરિયાદી તથા તેમના સાથી ડોકટર બન્ને વિરૂદ્ધની પ્રાથમિક તપાસનાં કામે તરફેણમાં કાર્યવાહી કરાવવા માટે  દીનેશભાઇ પરમાર, અધીક સચીવ (તપાસ), વર્ગ-1 આરોગ્ય અને પરિવાર કલ્યાણ વિભાગ સાથે મીટિંગ કરવા બોલાવ્યા હતા.

જેથી ફરિયાદી અને તેમના સાથી ડોકટર મિત્ર ગાંધીનગર ખાતે જઇને ગિરીશ પરમાર અને દિનેશ પરમારને રૂબરૂમાં મળી વાતચીત કરી હતી. આ દરમિયાન બન્ને આરોપીઓએ તેમની પાસેથી રૂ. 30,00,000/- ની લાંચની માંગણી કરી હતી. જેમાં તે પૈકી રૂ.15,00,000/- એડવાન્સ અને બાકીના ફરિયાદીનું કામ થઇ ગયા પછી આપવાનો વાયદો કરવામાં આવ્યો હતો.

ત્યારબાદ આરોપી ગિરીશ પરમાર ફરિયાદીને ટેલીફોન કરી નાણાંની માંગણી કરતા હતા. પરંતુ ફરિયાદી લાંચનાં નાણાં આપવા માંગતા ના હોઇ એસીબીનો સંપર્ક કરી ફરિયાદ આપતા  લાંચના છટકાનું આયોજન કરવામાં આવ્યું હતું. ટ્રેપ દરમ્યાન ગિરીશ પરમારે શાહીબાગ અમદાવાદ ખાતે ફરિયાદીને પોતાના ઘરે લાંચનાં નાણાં આપવા બોલાવ્યા હતા. આ દરમિયાન ફરિયાદી સાથે નક્કી થયેલા વાયદા મુજબ એડવાન્સ પેટે 15 લાખ રૂપિયા સ્વીકારતાં રંગેહાથ ઝડપાઇ ગયા હતા.