– મિત્રો વચ્ચે હાથ ઉછીના પૈસા માંગવાની બાબતે થયેલ ઝઘડાએ વિકરાળ સ્વરૂપ ધારણ કરતા યુવકે જીવ ગુમાવ્યો
(જ્યશીલ પટેલ,ઝઘડીયા)
ભરૂચ જીલ્લાના ઝઘડિયા તાલુકાના બામલ્લા ગામે નજીવી બાબતે થયેલ ઝઘડામાં એક ૨૬ વર્ષીય યુવકની હત્યા થઈ હોવાની ઘટના બનવા પામી છે. આ અંગે ઉમલ્લા પોલીસમાંથી મળતી વિગતો મુજબ બામલ્લા ગામે રહેતા હસમુખ રમેશ વસાવાને ગતરોજ તા.૧૨ મીના રોજ રાતના સાડા અગિયાર વાગ્યાના અરસામાં રવિન્દ્ર છત્રસીંગ વસાવા રહે.ગામ બામલ્લા તા.ઝઘડિયા તથા ગૌતમ દેવેન્દ્ર વસાવા રહે.ગામ તવડી તા.ઝઘડિયાના સાથે પૈસાની લેવડ દેવડ બાબતે ઝઘડો થયો હતો.આ અંગે ઉમલ્લા પોલીસનો સંપર્ક કરતા જાણવા મળેલ કે હસમુખ વસાવા, રવિન્દ્ર વસાવા તથા ગૌતમ વસાવા મિત્રો હતા,અને હાથ ઉછીના પૈસા માંગવાની બાબતે આ ઝઘડો થયો હતો.સામાન્ય ગણાતા આ ઝઘડાએ વિકરાળ સ્વરૂપ ધારણ કરતા રવિન્દ્ર વસાવા અને ગૌતમ વસાવાએ બોલાચાલી કરી હસમુખ સાથે ઝઘડો કર્યો હતો અને રવિન્દ્ર વસાવાએ હસમુખ વસાવાને લાકડાથી માર માર્યો હતો,તેમજ ગૌતમ વસાવાએ પણ હસમુખને ઢિકાપાટુનો માર માર્યો હતો.આ ઝઘડા દરમ્યાન હસમુખ વસાવાને ગંભીર ઈજાઓ થઈ હતી.ઈજાગ્રસ્ત યુવક હસમુખ વસાવાને સારવાર માટે ઉમલ્લા સરકારી દવાખાને લઈ જવાયો હતો જ્યાં તેને મરણ પામેલ જાહેર કરાયો હતો.આ ઘટના બાદ હસમુખ સાથે ઝઘડો કરનાર બન્ને ઈસમો ઘટના સ્થળેથી નાશી ગયા હતા.ઘટના સંદર્ભે મૃતક હસમુખ વસાવાના સંબંધી દેવન વસાવા રહે.ગામ બામલ્લા તા.ઝઘડિયાનાએ રવિન્દ્ર છત્રસીંગ વસાવા રહે.ગામ બામલ્લા તા.ઝઘડિયા તેમજ ગૌતમ દેવેન્દ્ર વસાવા રહે.ગામ તવડી તા.ઝઘડિયાના વિરુધ્ધ ઉમલ્લા પોલીસમાં ફરિયાદ લખાવતા પોલીસે ગુનો નોંધી કાયદેસર કાર્યવાહી હાથધરી હતી.
Author: BNI News
Tried to reach people by sharing on various social media platforms FACEBOOK, TWITTER, INSTAGRAM, TELEGRAM and WHATSAPP GROUP is
