ભરૂચ,
વાગરા તાલુકાના સારણ ગામે ગતરાત્રીના સમયે ચોરીનો બનાવ બનવા પામ્યો હતો.જેમાં સારણ ગામના દરગાહવાળા રોડ ઉપર આવેલ એક મકાનમાં પરિવાર હોવા છતાં ઘરમાંથી સોનાના દાગીના તેમજ રોકડ મળી અંદાજીત ૪૫ લાખની મત્તાની ચોરી થઈ હોવાની ઘટનાએ પંથકમાં ભારે હાહાકાર મચાવ્યો છે. વધુમાં આજ ગામના અન્ય બે સ્થળોએ પણ ચોરી થઈ હોવાની વાતો વહેતી થઈ છે.જોકે વાગરા પોલીસે તાત્કાલિક સ્થળ ઉપર પહોંચી જરૂરી કાર્યવાહી આરંભી હતી.
વાગરા તાલુકાના સારણ ગામે દરગાહ વાળા રોડ ઉપર આવેલ મકાનના માલિક ઝુલ્ફીકાર કાસમ રાજના જણાવ્યા અનુસાર તેઓ ગત રાત્રીના ૧૧.૩૦ વાગ્યે બહાર જમવા ગયા હતા. ત્યાંથી પરત આવી ૧૨:૩૦ થી ૧ વાગ્યા સુધી મોબાઈલ યુસ કર્યા બાદ રાબેતા મુજબ પરિવાર સાથે સુઈ ગયા હતા.ત્યાર બાદ ૪:૩૦ વાગ્યે તેઓની નાની છોકરીને દૂધ આપવા માટે ઉઠ્યા હતા.ત્યારે ઘરમાં રહેલો તિજોરીનો સામાન વેર વિખેર પડેલો જોઈ તેઓ ચોંકી ઉઠ્યા હતા.ત્યાર બાદ તેઓએ ઉપરના માળે જોઈ તપાસ કરતા ઘરનો સામાન જ્યાં ત્યાં પડેલો નજરે પડ્યો હતો.તિજોરીમાં રહેલ બેગમાં તપાસ કરતા બેગમાં રહેલા અંદાજિત ૩૦-૩૫ તોલા સોનાના દાગીના તેમજ ૧૦ લાખ રોકડ રકમ ગાયબ જણાતા ઘરમાં ચોરી થઈ હોવાનું માલુમ પડતા તેઓએ વાગરા પોલીસને જાણ કરતા ૫ કલાકે વાગરા પોલીસ બનાવવાળી જગ્યાએ દોડી જઈ તપાસ હાથધરી હતી.અંદાજીત ૪૫ લાખની મત્તાની ચોરીનો અંદાજ લગાવવામાં આવી રહ્યો છે.આ સહિત સારણ ગામમાં અન્ય બે સ્થળોએ પણ ચોરી થઈ હોવાની માહિતી આધારભૂત સૂત્રો થકી પ્રાપ્ત થઈ રહી છે.જોકે આ લખાઈ રહ્યું છે ત્યાં સુધી પોલીસ ફરિયાદ અંગે કોઈ માહિતી સાંપડી ન હતી.
Author: BNI News
Tried to reach people by sharing on various social media platforms FACEBOOK, TWITTER, INSTAGRAM, TELEGRAM and WHATSAPP GROUP is
