ભરૂચ,
ભાઈ-બહેનના પવિત્ર પ્રેમ અને લાગણીના પર્વ એવા રક્ષાબંધનની ભરૂચમાં અનોખી રીતે ઉજવણી કરવામાં આવી હતી.ભરૂચ રેલવે પોલીસ સ્ટેશનના કર્મચારીઓ દ્વારા ઘરડા ઘર ખાતે જઈને વડીલો સાથે રક્ષાબંધનનો તહેવાર ઉજવવામાં આવ્યો હતો.
રક્ષાબંધન નિમિત્તે રેલવે પોલીસના કર્મચારીઓ ઘરડા ઘરમાં પહોંચ્યા હતા, જ્યાં વડીલો સાથે આત્મીય મુલાકાત કરી તેમના આશીર્વાદ મેળવ્યા હતા.આ પ્રસંગે રાખડી બાંધીને ભાઈ-બહેનના પવિત્ર સંબંધની લાગણીને ઉજાગર કરવામાં આવી હતી.
પોલીસ કર્મચારીઓની આ પહેલથી ઘરડા ઘરમાં પણ ખુશી અને આનંદનો માહોલ જોવા મળ્યો હતો. સામાન્ય રીતે ફરજ દરમિયાન કાયદો અને વ્યવસ્થા જાળવતા પોલીસ કર્મચારીઓએ રક્ષાબંધનના પર્વે માનવતાની લાગણી સાથે વડીલો વચ્ચે સમય વિતાવી તહેવારની ખુશી વહેંચી હતી.
“ફરજ સાથે માનવતા પણ જરૂરી” — આ સંદેશને સાર્થક કરતી ભરૂચ રેલવે પોલીસની આ પહેલની સરાહના કરવામાં આવી હતી. વડીલો સાથે હળવી વાતચીત કરી તેમના સુખ-દુઃખ જાણ્યા હતા અને તહેવારની શુભેચ્છાઓ પાઠવી હતી.
રક્ષાબંધનના પવિત્ર દિવસે ભરૂચ રેલવે પોલીસ દ્વારા કરવામાં આવેલી આ અનોખી ઉજવણી માત્ર એક તહેવારની ઉજવણી ન રહેતા પોલીસ અને સમાજ વચ્ચેના લાગણીસભર સંબંધને વધુ મજબૂત બનાવતી પહેલ બની હતી.
