– નાના પથ્થરો માંથી તૈયાર થયેલી મગરની ભવ્ય પ્રતિકૃતિ બની પ્રવાસીઓના આકર્ષણનું કેન્દ્ર
(જ્યોતિ જગતાપ,રાજપીપળા)
નર્મદા જિલ્લાના એકતાનગરમાં પ્રવાસનનાં વિવિધ આકર્ષણો વચ્ચે ગોરા બ્રિજ પર આવેલી નાના પથ્થરોમાંથી તૈયાર કરાયેલી વિશાળ કૃત્રિમ મગરની પ્રતિકૃતિ પ્રવાસીઓ માટે આકર્ષણનું અનોખું કેન્દ્ર બની રહી છે.
નર્મદા નદીના વિશાળ પટ અને આસપાસના નયનરમ્ય વાતાવરણ વચ્ચે અડીખમ ઊભેલી મગરની આ ભવ્ય રચના પ્રથમ નજરે જ સહેલાણીઓનું ધ્યાન ખેંચે છે.નર્મદા માતાના વાહન તરીકે મગરનું ધાર્મિક અને સાંસ્કૃતિક મહત્ત્વ પણ આ પ્રતિકૃતિને વિશિષ્ટ બનાવે છે.પ્રકૃતિની નજીક માનવસર્જિત કલ્પનાને સાકાર કરતી આ રચના ગોરા બ્રિજના દૃશ્યને આગવી ઓળખ આપે છે.
મગરની આ પ્રતિકૃતિ માત્ર એક શિલ્પ પૂરતી મર્યાદિત નથી, પરંતુ પ્રવાસન સ્થળની ઓળખને વધુ રસપ્રદ બનાવતું માનવસર્જિત નજરાણું છે. નર્મદા માતાના વાહન તરીકે મગરની માન્યતા સાથે જોડાયેલી આ રચના ધાર્મિક આસ્થા, પ્રતીકાત્મકતા અને સર્જનાત્મક કળાનું અનોખું સંયોજન રજૂ કરે છે. બાળકોમાં ખાસ ઉત્સુકતા જગાવતી આ રચના પરિવાર સાથે ફરવા આવતા પ્રવાસીઓ માટે ફોટોગ્રાફીનું પણ આકર્ષણ બની શકે છે.
માં નર્મદા નદીનું કુદરતી સૌંદર્ય, પથ્થરો માંથી સાકાર થયેલી કલાકૃતિ અને સ્ટેચ્યુ ઑફ યુનિટીની ભવ્યતા મળીને પ્રકૃતિ તથા માનવસર્જિત કળા વચ્ચેનો સુંદર દૃશ્યાત્મક સંવાદ સર્જે છે.
વિશ્વની સૌથી ઊંચી પ્રતિમા સ્ટેચ્યુ ઑફ યુનિટીના સાનિધ્યમાં વિકસતા એકતાનગરમાં આવા વિશિષ્ટ આકર્ષણો પ્રવાસનના અનુભવને વધુ વૈવિધ્યસભર બનાવે છે. ગોરા બ્રિજ પરથી મગરની પ્રતિકૃતિ સાથે નર્મદા નદી અને સ્ટેચ્યુ ઑફ યુનિટીને નિહાળવાની તક પ્રવાસીઓને અહીંના પ્રવાસન પરિસરના એક અલગ પાસાનો પરિચય કરાવે છે.આજના પ્રવાસન યુગમાં સ્થળની વિશેષતા માત્ર તેની કુદરતી સુંદરતા પૂરતી સીમિત રહેતી નથી; અનોખી રચનાઓ અને યાદગાર દૃશ્યો પણ પ્રવાસીઓને આકર્ષવામાં મહત્ત્વની ભૂમિકા ભજવે છે. ગોરા બ્રિજ પર નાના પથ્થરોમાંથી તૈયાર કરાયેલી વિશાળ કૃત્રિમ મગરની પ્રતિકૃતિ આ જ બાબતનું ઉદાહરણ છે. તેની વિશિષ્ટ રચના પ્રવાસીઓને ફોટોગ્રાફી માટે નવો વિષય આપે છે અને એકતાનગરની મુલાકાતને યાદગાર બનાવે છે.
