– ભરૂચ જિલ્લામાં પાલક માતા-પિતા યોજના અંતર્ગત બાળકોના શિક્ષણ અને સંભાળ માટે આર્થિક સહાયનો વ્યાપ
– અનાથ અને જરૂરિયાતમંદ બાળકોના ઉજ્જવળ ભવિષ્ય માટે રાજ્ય સરકારની સંવેદનશીલ પહેલ
– જિલ્લામાં ૮૭૧ અનાથ બાળકોને પાલક માતા-પિતા યોજના હેઠળ માસિક ૩,૦૦૦ની સહાય
ભરૂચ,
ભરૂચ જિલ્લા બાળ સુરક્ષા એકમ દ્વારા સંભાળ અને રક્ષણની જરૂરિયાત ધરાવતા બાળકોના કલ્યાણ અને સુરક્ષા માટે વિવિધ સરકારી યોજનાઓનો અસરકારક અમલ કરવામાં આવી રહ્યો છે.નિરાધાર, અનાથ તેમજ મુશ્કેલ પરિસ્થિતિમાં રહેલા બાળકોને સમાજની મુખ્ય ધારામાં લાવવા માટે સરકારશ્રી દ્વારા વિવિધ પ્રકારની આર્થિક સહાય, શિક્ષણ, આરોગ્ય, પોષણ અને આશ્રયની સુવિધાઓ પૂરી પાડવામાં આવે છે.
જિલ્લા વહીવટીતંત્રના માર્ગદર્શનમાં સમાજિક ન્યાય અને અધિકારીતા વિભાગ ગુજરાત હસ્તક જિલ્લા બાળ સુરક્ષા એકમ કચેરી દ્નારા પાલક માતા-પિતા યોજના હેઠળ ભરૂચ જિલ્લામાં ૮૭૧ અનાથ બાળકોને માસિક ૩,૦૦૦ની સહાય તેમના સંભાળ તથા શૈક્ષણિક ખર્ચ માટે આપવામાં આવે છે. કોરોના મહામારી દરમ્યાન માતા-પિતા ગુમાવનાર ૩૦ બાળકોને માસિક ૪૦૦૦ અને માતા કે પિતા પૈકી કોઈ એકને ગુમાવનાર ૧૦૧૫ બાળકોને માસિક ૨,૦૦૦ની સહાય તેમના અભ્યાસ માટે ૧૮ વર્ષની ઉંમર પૂર્ણ થાય ત્યાં સુધી આપવામાં આવી રહી છે.
સંભાળ અને રક્ષણની જરૂરિયાત ધરાવતા બાળકોને સંસ્થાકીય સંભાળમાંથી પરિવાર સાથે પુનઃસ્થાપિત કર્યા બાદ ૧૪૩ બાળકોને રાજ્ય સરકારની માસિક ૩,૦૦૦ અને કેન્દ્ર સરકારની માસિક ૪૦૦૦ ની સહાય તેમના શિક્ષણ અને સંભાળ માટે આપવામાં આવે છે.
એચ.આઈ.વી.પોઝિટિવ બીમારીથી અસરગ્રસ્ત બાળકો અથવા તેમના માતા-પિતા પૈકી કોઈ એક અસરગ્રસ્ત હોય તેવા ૧૫૦ બાળકોને ધોરણ મુજબ શૈક્ષણિક શિષ્યવૃત્તિ આપવામાં આવે છે.
આ ઉપરાંત સંભાળ અને રક્ષણની જરૂરિયાત ધરાવતા ૧૬૫ બાળકોને સંસ્થાકીય આશ્રય આપવામાં આવ્યો છે, જ્યાં તેમને શિક્ષણ, આરોગ્ય, પોષણ અને સુરક્ષા સહિતની જરૂરી સેવાઓ સાથે ગુણવત્તાયુક્ત સંભાળ પૂરી પાડવામાં આવે છે.
પાલક માતા-પિતા યોજના તથા મુખ્યમંત્રી બાળ સેવા યોજનાના લાભાર્થી દીકરીઓ ૧૮ વર્ષની ઉંમર પૂર્ણ કર્યા બાદ લગ્ન કરે ત્યારે તેમના ગૃહસ્થ જીવનની શરૂઆત સરળ બને તે હેતુથી લગ્ન સહાય પેટે ૨ લાખની સહાય આપવામાં આવે છે.આ યોજના હેઠળ અત્યાર સુધીમાં ૨૫ દીકરીઓને કુલ ૫૦,૦૦,૦૦૦ લાખની સહાય આપવામાં આવી છે.
આમ ભરૂચ જિલ્લા બાળ સુરક્ષા એકમ દ્વારા સરકારની વિવિધ કલ્યાણકારી યોજનાઓનો લાભ જરૂરિયાતમંદ બાળકો સુધી પહોંચાડી તેમના શિક્ષણ, આરોગ્ય, પોષણ, સુરક્ષા અને સર્વાંગી વિકાસ માટે સંવેદનશીલ અને અસરકારક કામગીરી કરવામાં આવી રહી છે.
