ભરૂચ,
ભાવનગરમાં બનેલી કથિત લઠ્ઠાકાંડની ઘટનાના પડઘા હવે આમોદ તાલુકામાં પણ જોવા મળ્યા છે. સમગ્ર મામલે તંત્રની કામગીરી સામે સવાલો ઉઠાવતા આમોદ તાલુકા કોંગ્રેસ સમિતિ દ્વારા ડૉ.બાબાસાહેબ આંબેડકરની પ્રતિમા નજીક બેનરો અને પ્લેકાર્ડ સાથે ઉગ્ર વિરોધ પ્રદર્શન યોજી સરકાર અને તંત્ર સામે આક્રોશ વ્યક્ત કરવામાં આવ્યો હતો.ત્યાર બાદ કોંગ્રેસના આગેવાનો અને કાર્યકરો દ્વારા આમોદ પોલીસ સ્ટેશન ખાતે પહોંચી પોલીસને લેખિત આવેદનપત્ર પાઠવી કડક કાર્યવાહી કરવાની માંગ કરવામાં આવી હતી.આમોદ તાલુકા કોંગ્રેસ સમિતિના પ્રમુખની આગેવાનીમાં યોજાયેલા વિરોધ કાર્યક્રમમાં મોટી સંખ્યામાં કોંગ્રેસના કાર્યકરો જોડાયા હતા. હાથમાં બેનરો અને પ્લેકાર્ડ સાથે કાર્યકરોએ કથિત લઠ્ઠાકાંડના મુદ્દે જવાબદારો સામે કડક પગલાં ભરવાની માંગ સાથે ઉગ્ર સૂત્રોચ્ચાર કર્યા હતા. કોંગ્રેસે આ સમગ્ર ઘટનાને ગંભીર ગણાવી નશાના ગેરકાયદેસર વેપાર સામે તંત્રએ માત્ર કાગળ પર નહીં પરંતુ જમીન પર પણ અસરકારક કાર્યવાહી કરવાની જરૂરિયાત વ્યક્ત કરી હતી. આવેદનપત્રમાં આક્ષેપ કરવામાં આવ્યો છે કે આમોદ શહેર અને તાલુકાના કેટલાક વિસ્તારોમાં કથિત રીતે ગેરકાયદેસર દારૂનું વેચાણ અને હેરાફેરી થતી હોવાની ફરિયાદો વચ્ચે તંત્રની કામગીરી સામે અનેક સવાલો ઉભા થઈ રહ્યા છે.ખાસ કરીને યુવાનો અને નવી પેઢીને નશાની લતથી બચાવવા માટે કડક અને સતત કાર્યવાહી જરૂરી હોવાનું કોંગ્રેસે જણાવ્યું હતું. વધુમાં આમોદ તાલુકા કોંગ્રેસ પ્રમુખ નરેન્દ્ર પટેલે મામલાની ગંભીરતા દર્શાવતા આમોદ પોલીસ ઇન્સ્પેક્ટર સમક્ષ બે હાથ જોડીને અને પગે પડી વિનંતી કરી હતી કે, સાહેબ આમોદમાંથી દારૂનું દુષણ દૂર કરો. આ દૃશ્યે સમગ્ર મામલાની ગંભીરતા છતી કરી હતી. કાયદો અને વ્યવસ્થા જાળવવાની જવાબદારી ધરાવતા તંત્ર સમક્ષ આ રીતે વિનંતી કરવાની ફરજ પડે તે સ્થિતિને લઈને પણ સવાલો ઉઠી રહ્યા છે. કોંગ્રેસે સ્પષ્ટ માંગ કરી છે કે આમોદ તાલુકામાં ચાલતા કથિત ગેરકાયદેસર દારૂના કારોબાર સામે માત્ર દેખાવ પૂરતી કાર્યવાહી નહીં, પરંતુ મૂળ સુધી પહોંચી કડક અને કાયમી પગલાં લેવામાં આવે, જેથી યુવાનો અને પરિવારોને નશાના દુષણથી બચાવી શકાય.
કોંગ્રેસે પોલીસ સમક્ષ માંગ કરી છે કે આમોદ તાલુકાના વિવિધ વિસ્તારોમાં દારૂના ગેરકાયદેસર વેપાર, સંગ્રહ અને હેરાફેરી સામે સઘન ચેકિંગ હાથ ધરવામાં આવે તેમજ જવાબદાર તત્વો સામે કાયદેસરની કડક કાર્યવાહી કરવામાં આવે.માત્ર દેખાવ પૂરતી કાર્યવાહી નહીં પરંતુ ગેરકાયદેસર દારૂના નેટવર્કના મૂળ સુધી પહોંચી તેને સંપૂર્ણપણે અટકાવવામાં આવે તેવી પણ માંગ ઉઠાવવામાં આવી હતી.કોંગ્રેસના આગેવાનોનું કહેવું છે કે નશાનો ગેરકાયદેસર વેપાર સમાજ માટે ગંભીર ખતરો છે. અને તેના કારણે અનેક પરિવારોનું ભવિષ્ય બરબાદ થઈ શકે છે. જો તંત્ર દ્વારા સમયસર અને અસરકારક કાર્યવાહી નહીં કરવામાં આવે તો આગામી દિવસોમાં આ મુદ્દે વધુ ઉગ્ર કાર્યક્રમો કરવાની ચીમકી પણ આવેદનપત્રમાં આપવામાં આવી છે. ભાવનગરની ઘટનાને પગલે આમોદમાં કોંગ્રેસના આ વિરોધે સ્થાનિક સ્તરે પણ નશાના ગેરકાયદેસર વેપાર સામે તંત્રની જવાબદારીને લઈને ચર્ચા તેજ કરી છે. હવે પોલીસ અને વહીવટી તંત્ર આ મામલે કેટલી કડક કાર્યવાહી કરે છે અને કોંગ્રેસ દ્વારા કરવામાં આવેલા આક્ષેપોની તપાસમાં શું બહાર આવે છે તેના પર સૌની નજર રહેશે. ઉલ્લેખનીય છે કે ભાવનગરના કથિત લઠ્ઠાકાંડના મુદ્દે ભરૂચમાં પણ કોંગ્રેસ દ્વારા વિરોધ પ્રદર્શન યોજી જવાબદાર તંત્ર સામે આક્રોશ વ્યક્ત કરવામાં આવ્યો હતો.આ ઘટનાના પડઘા હવે માત્ર ભાવનગર કે ભરૂચ પૂરતા સીમિત ન રહેતા સમગ્ર રાજ્યમાં જોવા મળી રહ્યા છે અને વિવિધ સ્તરે વિરોધનો સૂર ઉઠી રહ્યો છે.નશાના ગેરકાયદેસર કારોબારને લઈને લોકોમાં પણ ભારે રોષ જોવા મળી રહ્યો છે.ત્યારે સરકાર અને તંત્ર દ્વારા માત્ર દેખાવ પૂરતી કાર્યવાહી નહીં, પરંતુ જવાબદારો સુધી પહોંચી કડક અને અસરકારક પગલાં ભરવામાં આવે તેવી લોકમાંગ ઉઠી રહી છે.
