– ભરૂચમાં ધાર્મિક સ્થળો અને શાળાઓની નજીક ડમ્પીંગ સાઈટ ઉભી નહી કરવાની માંગ સાથે સ્થાનિકોની કલેક્ટરને રજુઆત
– ભરૂચ પાલિકા પાસે કોઈ કાયમી ડમ્પીંગ સાઈટ નહીં હોવાથી વારંવાર ડમ્પીંગ સાઈટ મુદ્દે વિવાદમાં રહી છે : સ્થાનિકોની આંદોલનની ચીમકી
ભરૂચ,
ભરૂચ શહેરના પશ્ચિમ વિસ્તારમાં નવી ડમ્પિંગ સાઈટ બનાવવાના મુદ્દે સ્થાનિકોએ કલેક્ટર કચેરીમાં જોરદાર વિરોધ નોંધાવ્યો છે.સોમવારે મોટી સંખ્યામાં સ્થાનિક રહીશો, કોર્પોરેટર અને પાલિકાના વિપક્ષના સભ્યોએ કલેક્ટર કચેરી ખાતે એકત્રિત થઈ સૂત્રોચ્ચાર કર્યા હતા.
નગરપાલિકાએ મનુબર ગામ નજીક બૌડા વિસ્તારમાં આવેલા ખુલ્લા પ્લોટમાં નવી ડમ્પિંગ સાઈટ માટે ખોદકામ શરૂ કર્યું હતું.શનિવારે સ્થાનિકોએ વિરોધ કરી મુખ્ય અધિકારી હરીશ અગ્રવાલ સહિતના પાલિકા કર્મચારીઓનો ઘેરાવ કરી કામગીરી અટકાવી હતી.સ્થાનિકોનું કહેવું છે કે આ જમીન ફાયર સ્ટેશન માટે ફાળવાયેલી છે અને આસપાસ ધાર્મિક સ્થળો તેમજ શાળાઓ આવેલી હોવાથી અહીં ડમ્પિંગ સાઈટ બનાવવી યોગ્ય નથી.
ઉલ્લેખનીય છે કે થામ ગામ પાસે સ્થાનિક રહીશોના વિરોધને કારણે અગાઉની ડમ્પિંગ સાઈટ બંધ કરવી પડી હતી.હવે જો પાલિકા નવી ડમ્પિંગ સાઈટની કામગીરી બંધ નહીં કરે તો સ્થાનિકોએ ગાંધી ચિંધ્યા માર્ગે આંદોલન કરવાની ચેતવણી આપી છે.આ વિરોધ પ્રદર્શનમાં વિપક્ષ નેતા સમસાદઅલી સૈયદ, હેમેન્દ્ર કોઠીવાલા, સલીમ અમદાવાદી અને સામાજિક કાર્યકર્તા અબ્દુલ કામથી સહિત અનેક સ્થાનિક લોકોએ ભાગ લીધો હતો. 
અત્રે ઉલ્લેખનીય છે કે રાજકીય દાવચેપમાં સતત ડમ્પીંગ સાઈટ મુદ્દે વિવાદમાં રહેતી ભરૂચ નગરપાલિકા માટે કચરાના નિકાલનો પ્રશ્ન હજુ પણ યથાવત રહ્યો છે.ત્યારે પાલિકા દ્વારા કચરાના નિકાલ માટે કાયમી ડમ્પીંગ સાઈટ ઉભી કરવી અથવા તો વાગરાના સાયખા ખાતે પાલિકાને ફાળવેલી જમીનમાં કાયમી ડમ્પીંગ સાઈટ ઉભી કરે તે જરૂરી બન્યું છે.
Author: BNI News
Tried to reach people by sharing on various social media platforms FACEBOOK, TWITTER, INSTAGRAM, TELEGRAM and WHATSAPP GROUP is
