– ૪૨ અલગ અલગ પ્રમાણપત્રો અને સર્ટિફિકેટ,મોબાઈલ, મહાત્મા ગાંધી યુનિવર્સિટીનો સિક્કો અને લેપટોપ કબ્જે કર્યા
ભરૂચ,
અંકલેશ્વરની રોયલ એકેડમી કોમ્પ્યુટર ક્લાસીસની આડમાં ચાલતું દેશ વ્યાપી ડુપ્લીકેટ માર્કશીટનું કૌભાંડ ઝડપાવવાના મામલામાં પોલીસે મુખ્ય સૂત્રધારની દિલ્હીથી ધરપકડ કરી કાયદેસરની કાર્યવાહી હાથધરી છે.
અંકલેશ્વરના હેપ્પી કોમ્પલેશ્કમાં આવેલ રોયલ એકેડમી કોમ્પ્યુટર કલાસીસની આડમાં ચાલતું દેશ વ્યાપી ડુપ્લીકેટ માર્કશીટનું કૌભાંડ સામે આવ્યું હતું.જેમાં પોલીસે એકેડમીના સંચાલક જયેશ પ્રજાપતિની અટકાયત કરી હતી.પોલીસે વધુ તપાસ કરતા ઘટના સ્થળેથી દિલ્હી બોર્ડ ઓફ સિનિયર સેકેન્ડરી એજ્યુકેશ,મહાત્મા ગાંધી ઈન્સ્ટિટ્યૂટ ડિરેક્ટર ઓફ એમ્પ્લોયમેન્ટ અને ટ્રેનિંગ ગુજરાત કાઉન્સિલ ઓફ વોકેશનલ ટ્રેનિંગ ગાંધીનગર તથા સેકેન્ડરી સ્કૂલ એક્ઝામિશન – ૨૦૨૧ સર્ટિફિકેટ તથા પ્રોવિઝનલ નેશનલ ટ્રેડ સર્ટિફિકેટ અલગ અલગ કુલ ૨૧ ડુપ્લીકેટ માર્કશીટ અને પ્રમાણપત્રો મળી આવ્યા હતા.જેથી પોલીસે વધુ તપાસ હાથધરી ક્લાસીસ માંથી એક કોમ્પ્યુટર, કલર પ્રિન્ટર અને મોબાઈલ મળી કુલ ૪૫ હજારનો મુદ્દામાલ કબ્જે કરી તેની અટકાયત કરી હતી.
આ મામલામાં ડુપ્લીકેટ માર્કશીટ બનાવી આપનાર દિલ્હીના ભેજાબાજનો મોબાઈલ નંબર મળ્યા બાદ પોલીસે તપાસનો ધમધમાટ શરૂ કર્યો હતો.જેના આધારે પોલીસે ટેક્નિક સર્વેલન્સ શરૂ કરી એક ટીમ દિલ્હી રવાના કરી હતી.જો કે ગુનો અંકલેશ્વરમાં દાખલ થયા બાદ આરોપી ચંદન પ્રભાકર પાંડે જૂનો મોબાઈલ નંબર બંધ કરી અંડર ગ્રાઉન્ડ થઈ ગયો હતો.જે બાદ ભરૂચ પોલીસની ટીમે દિલ્હીમાં ધામાં નાંખી આખરે આરોપી ચંદન પાંડેની દિલ્હીના વજીરપુર ઈન્ડસ્ટ્રીયલ એરિયામાં આવેલ ઝુપડી માંથી મળી આવતા તેની ધરપકડ કરી તેની ૪૨ અલગ અલગ પ્રમાણપત્રો,સર્ટિફિકેટ તેમજ મહાત્મા ગાંધી ઈન્સ્ટીટ્યુટનો સિક્કો,કોમ્પ્યુટર તેમજ મોબાઈલ મળી આવતા પોલીસે તમામ મુદ્દામાલ કબ્જે કરી આરોપીને ભરૂચ લાવી કાયદેસરની કાર્યવાહી હાથધરી છે.
