ભરૂચ,
ભરૂચના હાંસોટના આમોદ ગામ નજીક આવેલ ખાનગી કંપનીમાં આગનો બનાવ સામે આવ્યો છે પંડવાઈ અને આમોદ ગામ નજીક આવેલ કબીર ટેક્સોફેબ કંપનીમાં બુધવારના રોજ રાત્રિના સમયે અચાનક જ આગ ફાટી નીકળી હતી. જોતજોતામાં આગે વિકરાળ સ્વરૂપ ધારણ કર્યું હતું અને ધુમાડાના ગોટેગોટા દૂર દૂર સુધી નજરે પડ્યા હતા. આ અંગેની જાણ કરવામાં આવતા જ એક પછી એક ત્રણ જેટલા ફાયર ફાયટર ઘટના સ્થળે દોડી આવ્યા હતા અને પાણીનો મારો ચલાવી આગ પર કાબુ મેળવવા પ્રયત્નો શરૂ કર્યા હતા.જે બાદ ભારે જહેમત બાદ આગ પર કાબુ મેળવવામાં સફળતા મળી હતી.બનાવની જાણ થતાની સાથે જ હાંસોટ મામલતદાર અને પોલીસનો કાફલો પણ ઘટના સ્થળે પહોંચ્યો હતો. સદ્દનસીબે આ બનાવમાં કોઈ જાનહની થઈ ન હતી.જોકે કંપનીમાં અચાનક જ આગ ફાટી નીકળતા દોડધામ મચી જવા પામી હતી.
