ભરૂચ,
ભરૂચમાં દિવાળીના પાવન પર્વ નિમિત્તે માનવતા, સેવાભાવ અને સામાજિક સંવેદનાનું સુંદર ઉદાહરણ જોવા મળ્યું હતું. તહેવારોની સાચી ઉજવણી ત્યારે જ સાર્થક બને છે, જ્યારે તેની ખુશીઓ સમાજના છેવાડે વસતા અને જરૂરિયાતમંદ લોકો સુધી પણ પહોંચે.આ જ ઉમદા ભાવનાને સાકાર કરતાં ભરૂચ ભાજપ લઘુમતી મોરચાના મહામંત્રી સાજીદ નવાબ અને તેમની ટીમ દ્વારા સેવા યજ્ઞ સમિતિ ખાતે નિરાધાર અને જરૂરિયાતમંદ લોકો માટે મીઠાઈ વિતરણનો સેવાકીય કાર્યક્રમ યોજવામાં આવ્યો હતો.
આ સેવાકીય પહેલ અંતર્ગત સાજીદ નવાબ અને તેમની ટીમે જરૂરિયાતમંદ લોકો વચ્ચે પહોંચી દિવાળીની મીઠાઈનું વિતરણ કર્યું હતું. આ દરમિયાન માત્ર મીઠાઈ આપવાની ઔપચારિકતા પૂરતી મર્યાદિત ન રહેતાં તેમની સાથે આત્મીયતાપૂર્વક સમય વિતાવી તહેવારની ખુશીઓમાં સહભાગી બનવાનો ભાવનાત્મક પ્રયાસ કરવામાં આવ્યો હતો.સામાન્ય રીતે તહેવારો દરમિયાન દરેક ઘરમાં આનંદ અને ઉત્સાહનો માહોલ જોવા મળતો હોય છે,પરંતુ અનેક નિરાધાર અને આર્થિક રીતે નબળા પરિવારો માટે આવી ખુશીઓ ઘણીવાર અધૂરી રહી જતી હોય છે.ત્યારે આવા લોકોના જીવનમાં પણ દિવાળીની મીઠાશ પહોંચે તેવા હેતુથી આ કાર્યક્રમનું આયોજન કરવામાં આવ્યું હતું.
દિવાળી માત્ર દીવા પ્રગટાવવાનો, આતશબાજી કરવાનો કે મીઠાઈ ખાવાનો તહેવાર નથી, પરંતુ બીજાના જીવનમાં ખુશીનો દીપ પ્રગટાવવાનો અને માનવતાના સંબંધોને વધુ મજબૂત બનાવવાનો અવસર છે.સાજીદ નવાબ અને તેમની ટીમ દ્વારા કરવામાં આવેલી આ સેવાકીય પ્રવૃત્તિએ આ જ સંદેશને જીવંત કર્યો હતો. જરૂરિયાતમંદ લોકોના ચહેરા પર સ્મિત લાવવાનો આ પ્રયાસ સમાજમાં સેવા, સહકાર અને સંવેદનશીલતાની ભાવનાને પ્રોત્સાહન આપનારો બન્યો હતો.સાચા અર્થમાં દિવાળીની ખુશીઓ ત્યારે જ પૂર્ણ થાય છે,જ્યારે આપણા આનંદમાં બીજાઓનો આનંદ પણ જોડાય અને આ પહેલે એ જ માનવતાનો પ્રકાશ પાથર્યો હતો.
