ગોગો સ્મોકિંગ પેપરના 818 બોક્સ મળી આવ્યા : 2 આરોપીઓને વોન્ટેડ જાહેર
ભરૂચ,
અંકલેશ્વર જીઆઇડીસી પોલીસે ગાંજાના સેવનમાં ઉપયોગમાં લેવાતા ગોગો સ્મોકિંગ કોન પેપરનો મોટો જથ્થો ઝડપી પાડવામાં સફળતા મેળવી છે. પોલીસે રૂપિયા 5.62 લાખની કિંમતના ગોગો સ્મોકિંગ કોનના જથ્થા સાથે બે આરોપીઓની ધરપકડ કરી છે.
અંકલેશ્વર જીઆઈડીસી પોલીસ દ્વારા ગાંજાના સેવન માટે ઉપયોગમાં લેવાતા ગોગો સ્મોકિંગ કોન પેપરનો મોટો જથ્થો ઝડપી પાડવામાં આવ્યો છે. અંકલેશ્વર જીઆઈડીસી પોલીસના સૂત્રોને બાતમી મળી હતી કે અંકલેશ્વર નજીક નેશનલ હાઈવે નંબર 48ની બાજુમાં આવેલ શિવમ રેસીડેન્સીના મકાન નંબર એ 31 માં રહેતો નરેશ પ્રજાપતિ અને હરીશ પ્રજાપતિ પ્રતિબંધિત ગોગો સ્મોકિંગ કોનનો મોટો જથ્થો મકાનમાં સંતાડી રાખ્યો છે.જેના આધારે પોલીસે દરોડા પાડતા મકાન માંથી રૂપિયા 5.62 લાખની કિંમતના ગોગો સ્મોકિંગ પેપરના 818 નંગ બોક્સ મળી આવ્યા હતા.પોલીસે બે મોબાઈલ સહિત કુલ રૂપિયા 5.72 લાખનો મુદ્દામાલ કબ્જે કર્યો હતો.આ મામલામાં આરોપીઓ દિનેશ પ્રજાપતિ અને રાજારામ પ્રજાપતિને વોન્ટેડ જાહેર કરવામાં આવ્યા છે જ્યારે નરેશ પ્રજાપતિ અને હરીશ પ્રજાપતિની ધરપકડ કરી કાયદેસરની કાર્યવાહી હાથ ધરવામાં આવી છે.
તાજેતરમાં જ રાજ્યના ગૃહ વિભાગ દ્વારા ગોગો પેપર કોનને પ્રતિબંધિત જાહેર કરવામાં આવ્યો છે.ત્યારે જીઆઈડીસી પોલીસને મોટો જથ્થો ઝડપી પાડવામાં સફળતા મળી છે.આરોપીઓ અમદાવાદ તરફથી હોલસેલમાં ગોગો સ્મોકિંગ કોનનો મોટો જથ્થો લાવતા હતા અને ત્યારબાદ છૂટકમાં વેચાણ કરતા હોવાનું પોલીસની પ્રાથમિક તપાસમાં બહાર આવ્યું છે.
